Сефте триумф за Фрајбург по рестартот на сезоната, Гладбах утре ќе навива за Баерн (видео)
Менхенгладбах е во битка за пласман во ЛШ, но по овој пораз тимот може да претрпи пад на табелата во зависност од исходот на утрешното дерби меѓу Леверкузен и Баерн
Фрајбург конечно оствари победа во петтиот меч по рестартот на сезоната во Бундеслигата, со минимални 1-0 совладан беше тимот на Борусија Менхенгладбах. Сефте трите бода за Фрајбург ѝ овозможија на екипата да сонува за Лигата на Европа, а воедно Гладбах западна во проблеми во нивниот поход кон пласман во Лигата на шампионите.
Единствениот погодок на средбата го реализира Петерсен во 58-та минута по успешно изведениот прекин на Грифо, а гостите западнаа во дополнителни проблеми по исклучувањето на Плеа во 68-та минута, па речиси и да немаа шанси за спас од пораз.
Фрајбург по 30-тото коло сигурно ќе се задржи на осмата позиција со 41 бод, еден помалку од Волфсбург и Хофенхајм, додека Менхенгладбах со 56 бода засега останува на четвртото место кое води во ЛШ, исто толку бода има и Баер Леверкузен, па затоа екипата од Борусија утре ќе навива за Баварците во нивното гостување на „Бај арена“.
