Селекторот на Лихтенштајн, Конрад Финфстик, го објави списокот со повикани фудбалери за натпреварите против Белгија и Македонија во квалификациите за пласман на Светското првенство 2026. На списокот се најдоа 23-ца фудбалери, а селекторот кусо ги анализираше и Белгија и Македонија.
„Кога ќе видите дека играчи како Де Брујне или Доку се на теренот, тоа е доживување за кое ќе можете да им раскажувате на внуците. Но нам не ни треба стравопочит – ни треба радост и страст. Од самиот почеток реков – внимавајте повеќе на Македонија. Играа силно против Велс и Белгија и ја победија Германија. Тоа ќе биде многу тежок натпревар. Сакаме да покажеме дека со срце и борбеност сме дел од сето ова – без разлика кој е противникот.“ – рече Финфстик.
Мечот помеѓу Македонија и Лихтенштајн се игра на седми септември од 18 часот на Националната арена „Тодор Проески“ во Скопје. Ова ќе биде единствениот квалификациски меч за нашите фудбалери, кои пред дуелот против Лихтенштајн ќе одиграат и пријателски натпревар против Саудиска Арабија во Чешка на четврти септември.
