Славниот холандски тренер Дик Адвокат испиша историја откако со селкцијата на Курасао се пласираше на Светското првенство кое ова лето ќе се игра во САД, Канада и Мексико. Иако до почетокот на Мундијалот има помалку од четири месеци, Адвокат реши да си поднесе оставка на селекторското место.
Адвокат, кој во минатото место селектор и на Холандија, Белгија и Јужна Кореја, а на клупско план ги предводел екипите на ПСВ Ајндховен, Сандерленд, Ренџерс… реши да си даде отказ од селекторското место поради здравствената состојба на неговата ќерка.
„Секогаш сум велел дека семејството е над фудбалот. Значи, оваа моја одлука е разбирлива. Секако, тоа не го менува фактот дека многу ќе ми недостасуваат луѓето од Курасао“, рече 78-годишниот Адвокат кој има речиси 40 години тренерско искуство.
На селекторското место во репрезентацијата на Корасао, Адвокат беше во последните две години и успеа со земјата од карипскиот остров да стигне до првиот настап на планетарниот собир.
На местото на Адвокат, селекторската функција ќе ја преземе неговиот 63-годишен сонародник Фред Рутен. Се работи за поранешен холандски дефанзивец кој како тренер ги водел екипите на ПСВ, Андерлехт и Феенорд.
На Светското првенство кое ќе биде за неколку месеци, Курасао ќе биде во група со репрезентациите на Германија, Брегот на Слонова коска и Еквадор. Првиот историски меч ќе го игра против Германија на 14 јуни на стадионот во Хјустон.
