Екипата на ТФТ Скопје е сензационален победник во четврт-финалната средба против Пелистер со 105:93 од кошаркарскиот Куп на Македонија.
Во СРЦ „Кале“, Битолчани важеа за фаворит не само за оваа средба туку и за освојување на Купот, но тие се „сопнаа“ на стартот, односно ТФТ одигра феноменален натпревар.
Уште по првата четвртина, тимот од Скопје имаше убаво водство (32:21), а на полувремето се замина со резултат од 56:47 и кога се очекуваше враќање на Битолчани и оправдување на фаворитската улога, се случи спротивното.
ТФТ одигра уште добри 10 минути, со кои си обезбеди предност од плус 14, кои беа недостижни за Пелистер (84:68).
Последната четвртина не донесе поголеми возбудувања бидејќи успешно беше одржувана огромната предност, за на крајот конечниот резултат да биде 105:93.
Најефикасен кошаркар беше Никола Малешевиќ од редовите на Пелистер со 29 уфрлени поени.
Од 14:30 часот се игра вториот четврт-финален меч меѓу актуелниот освојувач на титулата, МЗТ Скопје и Гостивар.
