Барселона синоќа со победата над Наполи од 3:1 си обезбеди место во четвртфиналето од Лигата на шампиони. Тимот на Кике Сетјен одигра одлично прво полувреме во кое домаќините дадоа три гола на „Камп Ноу“ и практично уште тогаш ги решија сите дилеми.
Следниот ривал на каталонците ќе биде најтрофејниот германски клуб Баерн Минхен, а Сетјен е оптимист, иако знае дека претстои тешка битка за влез во полуфиналето. Иако Барселона сезонава не освои ниту еден трофеј досега, стратегот на Барселона вели дека тие го имаат најдобриот тим во светот.
„Секогаш може да се одигра уште подобро, но ние против Наполи бевме одлични. Посебно во првото полувреме. Во еден ваков меч никогаш не може да ја играш само својата игра, туку мора да гледаш што прави и противникот. Барселона е најдобар тим во светот, но такви се и Реал Мадрид и Баерн Минхен. Во такви мечеви решаваат деталите. Задоволен сум од физичката подготвеност на екипата, но во петок ќе биде многу тешко против Баерн. Тоа е неверојатно добар тим. Ние го имаме Меси кој е најдобар фудбалер во светот, но Баерн го има Левандовски кој сезонава даде 13 гола во Лигата на шампиони“, вели задоволно Сетјен.
Токму Барселона и Баерн Минхен се единствените два клуба кои останаа, а во минатото биле шампиони на Европа. Останатите шест претставници во четвртфиналето ќе се борат за прв пат да станат фудбалски клупски владетели на Стариот континент.
