Понеделник ќе биде „денот Д“ за Премиер лигата. На состанокот кој ќе се одржи со челниците на првенството и претставниците на екипите ќе се разговара на повеќе теми, а проектот „рестарт“ е под закана да пропадне поради бунтот од страна на тимовите кои се борат за опстанок.
До вчера три клуба беа против доигрување на преостанатите 92 натпревари на неутрални терени, а на Астон вила, Брајтон и Ватфорд наводно се приклучија и Борнмут, Вест хем и Норвич.
Единствена опција за нив доколку сезоната мора да се доигра, е да нема испаѓање. Во спротивно тие ќе гласаат против рестарт на шампионатот кој е прекинат од 9 март поради пандемијата со корона-вирусот. Кога ќе дојде време за гласање, најмалку 14 гласови се потребни за да се добие зелено светло за рестарт на англиското првенство во кое останаа да се доиграат девет кола.
