Шалке 04 прими дупла доза голови од Хофенхајм од бројката што ја има во славното име на германскиот фудбал, а тоа на тимот од Гелзенкирхен му се случи во рок од само 4 дена.
Навивачите на Хофенхајм ги задеваат симпатизерите на седумкратниот германски првак и велат дека го прекрстиле тимот во Шалке 08 за само неколу дена, откако во петокот славеа триумф од 3:0 во меч од Бундеслигата, а вчера се радуваа и на победа од 5:1 во германскиот Куп.
Навивачите на тимот од Гелзенкирхен се бесни и скандираа Крамер-Раус, односно бараат заминување на тренерот Франк Крамер, кој пристигна на кормилото на клубот ова лето.
На последните четири меча, Шалке 04 претрпе четири порази и прими 15 гола, а последниот неуспех вчера го подразбуди спортскиот директор Роувен Шредер, кој вели дека вака веќе не оди.
„Ова е дебакл за клуб од калибарот на Шалке 04 и сега имаме јасна слика што ни се случува. Имавме состанок по мечот и јас презедов одговорност за играчите што ги имаме и шт ги немаме, а требаше да ги имаме. И тренерот Крамер мора да размисли како понатаму бидејќи вака веќе не оди“, изјави спортскиот директор.
Тој е еден од најголемите губитници во вакви моменти за гигантот, а еден од добитниците во оваа ситуација што е многу тешка за Шалке 04 е македонскиот репрезентативец Дарко Чурлинов.
Тој имаше желба да остане во Шалке 04 откако во ланската сезона му помогна да се врати во Бундеслигата, но раководството на тимот од Гелзенкирхен објави дека нема пари за да го откупи неговиот договор од Штутгарт за сума од околу 3 милиони евра.
Еден од виновниците за тоа е Шредер, кој како да не беше заинтересиран да притисне Дарко да остане во клубот, па Чурлинов се врати во Штутгарт, а потоа замина во Барнли во Англија.
