Кошаркарскиот шампион на Македонија, МЗТ Скопје, го доживеа првиот пораз во новата сезона откако вечерва загуби на гостувањето во Битола од Пелистер со 81-71. Ова е своевиден реванш на битолчани за поразот што го претрпеа во АБА-2 лигата со 91-78. Воедно денешната победа е прва за Пелистер во новата сезона откако во првите две кола изненадувачки загуби од Работнички и Гостивар.
Битолчани во текот на целиот меч диктираа темпо и имаа предност над противникот и на крајот сосема заслужено стигнаа до победата со двоцифрени 10 поени разлика. Бернар и Маслинко со по 21 поен беа најефикасни во победничкиот состав, воедно и воопшто на мечот. Во екипата на МЗТ Скопје најмногу поени уфрли Расел, 18.
На табелата првопласиран е Еуро Никел со максимални три победи, пред група од пет екипи кои имаат ефект од две победи и еден пораз, и тоа: МЗТ Скопје, Работнички, ТФТ, Чаир и Вардар.
