Неодамна пензионираниот голман Војчех Шченсни треба да се реактивира и да потпише за Барселона. Каталонскиот клуб има проблем по повредата на Марк-Андре тер Штеген и му е потребна сигурност на голот, а полскиот голман се чини дека е добро решение за нив.
Шченсни се повлече пред еден месец, кога спогодбено го раскина договорот со Јувентус. Иако е слободен играч, бидејќи имаше договор со торинскиот клуб и за актуелната сезона пред неговото раскинување, Барселона ќе мора да преговара и за отштета за него, по што тој би можело да му се приклучи на новиот клуб.
Сепак, „Мундо депортиво“ пишува дека Полјакот ѝ поставил услов на Барселона за „прекин на мирниот живот во Марбеља“, односно дека ќе дојде само доколку биде прв голман на клубот, а Инаки Пења повторно да се пресели на клупата.
Шпанските медиуми претходно објавија дека поранешниот голман на Арсенал и Јувентус ќе потпише договор до крајот на јуни следната година и дека за тоа ќе добие плата од три милиони евра, со можни бонуси.
Медицинските прегледи што треба да ги направи пред да пристигне во Барселона веќе се закажани за в понеделник.
