Холандија го запиша петтиот триумф во квалификациите за ЕП 2020 откако ја совлада Белорусија среде Минск со минимални 2-1. Лалињата ги предводеше расположениот Џини Вајналдум, фудбалерот на Ливерпул беше двоен стрелец за својата селекција и практично сам ги донесе новите бодови.
Холандија со овој триумф се зацврсти на челната позиција во групата Ц со 15 бода, три повеќе од Германија, додека Белорусија е претпоследна со четири бода по седум меча.
Шкотска го „почасти“ Сан Марино со шест гола (6-0) во нивната мрежа и воедно ја прекина серијата од четири последователни порази. Мекгин со својот хет-трик уште во првото полувреме ја осигура победата за шкотската селекција, а голеадата продолжи и во вторите 45 минути преку Шанкланд, Финдли и Армстронг.
Русија со убедливи 5-0 се враќа од гостувањето кај Кипар продолжувајќи ја победничката низа на седум меча. Черишев и Оздоев во првиот дел ја израдуваа Зборнаја, Ѕуба на десетина минути пред крајот зголеми на 3-0, додека Головин и Черишев во финишот од мечот стрелаа за високите 5-0. Русија е втората селекција покрај Белгија, која од групата И обезбеди пласман на Европското првенство за следната година.
Со погодокот на Корхут во 10-тата минута, Унгарија славеше минимално против Азербејџан за подвиг до второто место во групата Е. Унгарците сега имаа 12 бода, еден помалку од Хрватска, а два повеќе од Словачка, додека Азербејџан и натаму е без победа по шест одиграни средби.
