Шкендија има шанса за двоен ќар денеска на дербито од 10. коло против Работнички и ако успее да победи ќе остане единствената екипа без пораз во Првата македонска фудбалска лига и ќе се врати на врвот на табелата.
Тетовци од 14.30 часот ќе бараат и можност за реванш против Романтичарите кои ги поразија на последното гостување со 1:0 во последното коло од ланското првенство во март, кога следеше прекин на шампионатот поради корона-вирусот.
Второто дерби се игра во Скопје меѓу два клуба што имаат титули, а Вардар и е домаќин на Ренова. Стартот и на најтрофејната екипа во Македонија, Вардар и на клубот од Џепчиште е скромен сезонава, па бодовите им се исклучително потребни за бегство од опасната зона.
Единствениот клуб во Првата лига што нема победа и по 9 кола, Беласица очајно бара излез од кризата и ќе се обиде да го изненади Борец на свој терен во Струмица.
Беласица има само едно реми и 8 порази, па Велешани се фаворити за триумф што ќе ги задржи во квартетот најдобри екипи по 10 кола.
Двојки, 10. коло од 14.30 часот:
Шкендија – Работнички
Вардар – Ренова
Беласица – Борец
Пелистер – Струга Трим Лум
Македонија Ѓорче Петров – Академија Пандев
Вчера: Шкупи – Силекс 1:0
Табела: Шкупи 22, Шкендија 21, Македонија Ѓ.П. 16, Борец 15, Струга и Силекс по 14, Работнички, Пелистер и Вардар по 11, Ренова и Академија Пандев по 7, Беласица 1 бод.
