Скопското дерби меѓу Шкупи и Вардар ќе се игра денеска од 16:30 часот, но во Струмица и тоа пред празни трибини. Шкупи има проблеми со стадионот во Чаир кој не ги исполнува условите кои ги бара ВАР системот, па затоа чаирчани мораат да бараат алтернатовно решение за тоа каде ќе настапат. Овојпат го одбраа стадионот „Младост“ во Струмица.
Како домаќини и организатори на мечот, од Шкупи решија дуелот да се игра пред празни трибини. По првите три одиграни кола, Шкупи е закован на дното на табелата без ниту еден бод со гол-разлика 1:10. Тука треба да се спомене дека Шкупи поради проблеми со стадионот воопшто не го одигра мечот кој требаше да го има на свој терен против Силекс и загуби службено со 0:3.
Од друга страна, Вардар е екипа која сезонава најавува атак на титулата. по првите три кола Црвено-црните имаат седум од можните девет бодови. Вардарци киксираа во третото коло и тоа на свој терен против Брера кога одигра 2:2, па сега сигурно ова е мотив плус за нив да се вратат во победнички ритам.
Во четвртото коло од Прва лига уште ќе играат: Сабота: Аресими – Силекс, Башкими – Струга ТЛ, недела: Тиквеш – Брера, Македонија ЃП – Пелистер.
