Фудбалскиот клуб Мец со длабоко жалење објави дека Тахирис Дос Сантос, играч-стажант во клубот, е повреден во пожарот што избувна во ноќен клуб во Кран Монтана (Швајцарија) на новогодишната ноќ.
Со тешки изгореници, 19-годишниот лев бек кој настапува за Б тимот на Мец, бил префрлен во Германија, каде што моментно е на лекување. Најмалку 47 лица загинаа, додека 115 лица се повредени во експлозијата и пожарот што избувнаа за време на новогодишната ноќ во барот „Констелејшн“ во луксузниот скијачки центар Кран Монтана во Швајцарија. Жртви на експлозијата беа претежно млади луѓе.
„ФК Мец со длабоко жалење објавува дека Тахирис Дос Сантос, младински играч на клубот, по потекло од Мон Сен Мартен, е повреден во пожарот што се случи во Кран Монтана, Швајцарија, на новогодишната ноќ. Со тешки изгореници, 19-годишникот беше префрлен со хеликоптер во Германија, каде што моментално се лекува.
Длабоко погодени од оваа вест, раководството на клубот, играчите, тренерите и персоналот се во шок и му изразуваат искрено сочувство на Тахирис во овој тежок период додека се бори со својата болест.
Клубот, исто така, сака да му ја понуди својата целосна поддршка на неговото семејство и работи со медицинските власти за да организира трансфер на Тахирис во болницата „Мерси“, во близина на неговиот дом.
Ќе бидат дадени ажурирања за состојбата на Тахирис доколку има какви било значајни промени. Во меѓувреме, ФК Мец ги моли сите да ја почитуваат приватноста на Тахирис и неговото семејство“, објавија од францускиот прволигаш.
