Кошаркарската репрезентација на Црна Гора е елиминирана од Евробаскетот откако загуби со 89-83 од Велика Британија. На Црногорците им беше потребна победа против селекцијата која до пред овој меч ги загуби сите натпревари, но сега забележа победа и ќе ги чека резултатите од другите натпревари за евентуален пласман во осминафиналето.
Мечот започна очекувано и Црна Гора брзо дојде до предност од осум поени разлика, но Британците се вратија и на првата мини пауза заминаа со негатива само од еден поен. Во втората четвртина следуваше комплетен пресврт и Велика Британија со водство од 42-48 замина на полувремето.
Од тој момент, па сè до крајот на натпреварот, Црна Гора само еднаш имаше водство, и тоа во финишот кога поведе со 81-80, но следуваше серија од 5-0, а потоа и од 4-0 на Велика Британија за прва победа на Европското кошаркарско првенство.
Убедливо најефикасен кошаркар на мечот беше Никола Вучевиќ со 31 поен, додека во победничкиот состав најмногу поени уфрли Мајлс Хесом, 25.
