Португалскиот фудбалер Рафа Силва ја шокира јавноста, особено своите фанови и клубот за којшто игра, со изјавата дека повеќе не сака да игра фудбал и дека не е среќен.
Рафа Силва, кој има 25 настапи за Португалија, моментно е под договор со Бешикташ. Иако неговиот договор е до 2027 година, 32-годишниот играч е решен веднаш да ја заврши кариерата.
Претседателот на Бешикташ, Сердал Адал, се обидува да го убеди да се премисли. Сепак, незадоволниот играч изразил желба повеќе да не настапува. Неговата форма значително опадна, самиот вели дека не се чувствува среќно и дека тоа е крајот.
Наводно, Рафа Силва наскоро повторно ќе се сретне со Адал и ќе ја соопшти конечната одлука за својата иднина. Играчот, како што се наведува, рекол: „Не сум среќен, ќе го напуштам фудбалот ако биде потребно.“
„Имам големо почитување кон тренерот, но донесов одлука која нема да се менува“, додаде Португалецот по средбата што ја побарале главниот координатор на Бешикташ, Серкан Речбер, и тренерот Серген Јалчин.
Раководството на Бешикташ, соочено со можноста Рафа Силва да го напушти фудбалот, ја споменува и клаузулата според која „ако не се врати на терен, мора да плати отштета“ во случај на раскинување на договорот.
За Црните орли, Рафа Силва постигна 23 гола и забележа 16 асистенции на 65 настапи, а претходно играше за Бенфика и за Брага.
