Не стивнуваат реакциите по 67-мото издание на манифестација Златна топка, која осми пат заврши во рацете на аргентинскиот генијалец Лионел Меси. Сепак, шпанската „Марка“ се осврна на нереално добриот пласман на неколкумина фудбалери, пред сè, на ѕвездата на Реал Мадрид, Лука Модриќ.
Хрватот го освои 10-тото место, иако според шпанскиот весник, тоа е предобра позиција за него. Модриќ минатата сезона во Ла Лига на 33 натпревари постигна четири погодоци и запиша три асистенции. Во Лигата на шампионите даде само два гола, а единствениот трофеј што го освои е Купот на Шпанија. Сепак, Лука Модриќ го освои третото место со репрезентацијата на Хрватска на Светското првенство во Катар.
„Во изборот за Златната топка, Антоан Гризман е дури на 22-рото место. Многу чудно, со оглед на тоа дека блескаше во вториот дел од сезоната за Атлетико, но и за Франција, која ја одведе до финалето на Светското првенство. Токму поради тоа во изборот на ‘Марка’ е на седмото место. Мо Салах на Златната топка го освои 11-тото место, иако минатата сезона најблаго речено беше дискретен. Затоа во нашиот избор е на 37-мото место. Или Модриќ, кој е на високото 10-то место, но кај нас не заслужи ништо повеќе од 33-тата позиција“, се вели во анализата на шпанскиот весник „Марка“.
