Поминаа речиси пет години од скијачката несреќа во која тешко настрада легендарниот возач на Формула 1, Михаел Шумахер. Германецот кој освои седум шампионски трофеи во најбрзиот спорт најверојатно никогаш нема да може да закрепне по падот додека скијаше на француските Алпи.
Иако многу малку се знае за неговото здравје, британскиот таблоид „Експрес“ напиша текст за популарниот Шуми, во којшто се откриваат досега непознати детали.
„Според тоа што го знаеме за неговата повреда, Шумахер не може да оди, ниту да зборува, но извор ни тврди дека може да покаже емоции. Според извештајот на здравствената заштита, за куќна нега на Михаел досега се потрошени 22 милиони евра“, пишува во текстот на „Експрес“.
И францускиот магазин „Парис меч“ пишува за состојбата на легендарниот возач на Ф1. Тие дури тврдат дека имаат изјава од член на семејството.
„Кога ќе го ставите во инвалидска количка и го свртите кон прекрасната панорама со поглед на езерото, Михаел понекогаш знае да заплаче“, стои во пишувањето на францускиот магазин, кој се повикува на близок член на семејството на Шумахер.
