На трети јануари Михаел Шумахер ќе наполни 50 години, а на неговата интернет-страница излезе интервју кое тој го даде на 30-ти октомври 2013, неколку недели пред несреќата. Семејството на Шуми пет години молчи за неговата здравствена состојба, но објавено е старо, досега необјавено интервју на седумкратниот светски првак.
„Најемотивна титула дефинитивно ми беше онаа во 2000 година. На патеката „Сузука“ ја освоив титулата и тоа беше прва титула за Ферари по 21 година. Јас четири години се обидував на Ферари да му ја донесам таа титула и конечно успеав, па дефинитивно таа ми е омилена“, изјави Шумахер, кој за најпочитиван ривал го кажа Мика Хакинен.
Рекордерот по број на титули во Формула 1 рече дека спортски идол од детството му бил голманот Тони Шумахер, а од тркачите, додека возел картинг, му се допаѓале Аиртон Сена и Винченцо Соспири.
За Формула 1 вели дека е тимски спорт и секако дека не би успеал без помошта од екипата, а заедничко за сите три тима за коишто возеше е Рос Браун. Вели дека картингот многу му помогнал во кариерата бидејќи тие тесни трки „тркало до тркало“ се многу корисни за подоцна.
„Секогаш си велев дека не сум доволно добар и дека мора уште да работам и напредувам. Мислам дека тоа е еден од клучевите на успехот“, заклучи Шумахер.
