Швајцарската професионална триатлонка Имоген Симондс е привремено суспендирана поради допинг. Одлуката е донесена по тестот направен на 8 декември минатата година, кога во нејзиниот организам била пронајдена забранетата супстанца лигандрол. Се користи за подобрување на мускулната маса и речиси една деценија е на листата на забранети супстанци на WADA.
Симондс објасни дека ангажирала експерти за да истражат како супстанцата влегла во нејзиното тело. Таа објави на социјалните мрежи дека наодите сугерираат дека супстанцата ѝ е пренесена преку телесни течности од нејзиниот партнер.
„Истрагата откри дека мојот долгогодишен партнер, без мое знаење, земал лигандрол за да ја подобри својата кондиција околу времето на позитивниот тест“, изјави Симондс на нејзиниот профил на „Инстаграм“.
Таа верува дека супстанцата влегла во нејзиниот организам за време на сексуалниот однос на денот на тестот и претходниот ден. Тестот се одржа околу една недела пред таа да заврши на четвртото место на Светското првенство Ironman 70.3 во Таупо, Нов Зеланд. Два други теста спроведени во тој период биле негативни. Симондс тврди дека немала поим за присуството на лигандрол во нејзиниот систем кога тестот бил позитивен.
Таа додаде дека количината пронајдена во нејзиното тело е „еквивалентна на прстофат сол во олимписки базен“ и никогаш не би ѝ дала никаква предност во перформансите.
