Фудбалерот кој игра во средниот ред, Маркос Љоренте, се мачи во својот нов клуб Атлетико Мадрид, адаптацијата во шемите на Диего Симеоне не му оди лесно, и во црвено-белиот дрес игра уште помалку отколку во белиот на Реал, а токму малата минутажа во Реал Мадрид му беше главен мотив да си замине и да направи трансфер вреден околу 35 милиони евра.
Љоренте играше редовно во првите четири кола, но никогаш не остана на терен подолго од 45 минути. Неговото заковување на клупата се поклопува со голот на Мексиканецот Ектор Ерера против Јувентус. Љоренте доби шанса да игра од почеток против Алавес, но доби црвен картон. Симеоне во средниот ред за недопирливи ги смета Саул и Коке, а Томас Парти и Ерера добиваат предност пред Љоренте.
Љоренте има вкупно 310 минути во дресот на Атлетико, а најголем дел од летните засилувања веќе имаат над 1.000. Лани ова време, во декември, Љоренте блескаше во Реал, беше редовен стартер на местото на повредениот Касемиро, а беше најдобар и на светското клупско првенство каде даде гол во финалето. Во минатата сезона, до 8 декември, тој за Реал имаше играно 416 минути, значи 106 повеќе отколку сезонава за Јорганџиите.
