Торино ја совлада Лацио со 2-0 на домашен терен во 27-то коло на италијанската Серија А, остварувајќи значајна победа по серијата лоши резултати.
Биковите во овој дуел влегоа под притисок, откако претходните резултати беа разочарувачки. Новиот тренер Роберто Д’Аверса го презеде тимот од Марко Барони, а дебито му донесе охрабрувачки резултат за навивачите кои претходно оваа недела протестираа поради лошата состојба на клубот.
Торино поведе уште во десеттата минута, со погодок на Џовани Симеоне. Претходно ударот на Дуван Запата од 17 метри беше блокиран од Ромањоли, но топката доби неочекувана патека и стигна до Симеоне кој ја смести во мрежата на Проведел.
Вториот гол дојде во 53-та минута, кога тимската акција на домаќините беше крунисана со одличен центаршут од левиот бек Обрадор и прецизен удар со глава на Дуван Запата, за конечни 2-0.
