Атлетико Мадрид има драгоцена предност од 2:0 против Барселона по првиот меч во четвртфиналето на Лига на шампиони. Тренерот на мадриѓани, Диего Симеоне беше пресреќен по победата, потенцирајќи дека само со сплотена тимска игра може да се сопре противник како што е Барселона.
„Атлетико Мадрид долго време немаше победа на овој стадион. Тука секогаш играме многу тешко. Веројатно Барселона е најдобриот тим во Европа заедно со ПСЖ и Баерн Минхен. Благодарение на колективната игра, успеавме да ги победиме во многу важен момент за нас. Вториот гол ни даде дополнителна сигурност и самодоверба. Жалам што не успеавме уште повеќе да ја искористиме предноста од играч повеќе на теренот. На овој меч бевме максимално фокусирани и концентрирани“, задоволно коментираше Симеоне.
Предводникот на Атлетико знае дека има капитална предност, но сепак дека уште ништо не е готово и неговоиот тим ќе мора и во реваншот да одигра максимално сконцентрирано.
„Знаеме дека уште ништо не е готово. Ќе се обидеме пред нашите навивачи да одиграме уште еден добар натпревар. На нашиот терен секогаш имаме дополнителна предност благодарение на помошта од трибините. Резултатот што го остваривме е добар, но противникот со сигурност ќе направи да се намачиме и на реваншот“, додаде Симеоне.
