Денеска е објавена новата ранг-листа на најдобри светски тенисери, според која Јаник Синер е убедливо прв, а сега втор е Александер Зверев кој имаше скок за две места, додека Новак Ѓоковиќ имаше пад за две позиции и сега е четврти.
Ѓоковиќ со раното испаѓање во Њујорк загуби многу поени и сега има над двојно помалку поени од лидерот Синер. А, Новак може и да му се заблагодари на Италијанецот што е четврти, бидејќи ако Синер загубеше во четвртфиналето од Данил Медведев, сега Новак ќе беше дури петти на АТП листата.
Новак за првпат после јануари 2023 не е во Топ 3. Тогаш беше петти, но брзо после тоа ја освои десеттата титула на Австралијан опен.
Најдобриот македонски тенисер, Калин Ивановски, е 712-ти, што е напредок за пет места.
Кај жените, првото место на ВТА листата и понатаму е за Ига Швјонтек, втора е Арина Сабаленка, а сега трета е Џесика Пегула која напредуваше за три места. Лина Ѓорческа имаше пад за седум места и сега е 213-та.
