Перуанските спортски весници на насловните страници денеска објавуваат информации дека тренингот на нивната фудбалската репрезентација во пресрет на дуелот со домашниот Бразил, бил сниман со дрон, со цел „кариоките“ да добијат информации што подготвува Перу за вечерашниот меч во 21 часот.
Овие шпекулации и обвинувања од Перуанците, веднаш ги демантираше бразилскиот селектор Тите.
„На перуанските новинари им давам чесен збор дека не сме го шпиунирале тренингот. Ако се случило тоа без мое знаење, јас ќе си дадам оставка“ – рече Тите кој ако не ја освои Копа Америка, веројатно ќе биде сменет од функцијата.
Победникот од дуелот Перу – Бразил, ќе го освои првото место во групата А, а поразениот може да налета на Уругвај, Чиле или Колумбија, па затоа не е сеедно како ќе заврши мечот.
Додека траел тренингот на Перу, навистина дрон летал над теренот, но се верува дека бил на некој новинар, или некој аматер. За секој случај, Перуанците на тој тренинг не тренирале тактика, па и да е снимано од страна на Бразилците, нема да добијат многу информации.
