Фудбалот би можело да западне во уште еден обложувачки скандал. Последниве години се покренаа многу случаи во Европа и низ целиот свет, а најновиот пример доаѓа од Балканот.
И додека обично фудбалерите се тие кои се вмешани во местење натпревари и обложување, сега изгледа дека истиот случај се однесува и на судиите, и тоа од ВАР-собата.
Видео кое овие часови стана вирално на социјалните мрежи покажува што се случувало на натпреварот помеѓу ЦСКА и Локомотив Софија, кој заврши со победа од 1-0 за домашната екипа.
Резултатот од натпреварот го засени она што се случи непосредно пред почетокот на мечот. Како што е честа пракса во Италија и на многу други натпревари низ Европа и светот, телевизиската слика, непосредно пред стартот на натпреварот, се задржа неколку секунди во ВАР-собата.
Она што тогаш се појави пред очите на гледачите навистина беше загрижувачко. Техничар во ВАР-кабината, кој им помага на судиите при изборот на слики, беше фатен како на својот мобилен телефон прегледува страници за обложување.
Сликите го прикажуваат ВАР-судијата Волен Чинков и неговиот асистент Стојан Арсов фокусирани на мониторите, додека од нивната лева страна се наоѓаше трето лице – техничкиот оператор кој управува со сликите.
Тој во рацете држеше мобилен телефон со отворена страница од обложувалница.
Оваа сцена не им побегна на љубителите на фудбалот во Бугарија, кои веднаш реагираа на социјалните мрежи, изразувајќи незадоволство од она што го видоа.
Дури и самиот оператор кога се виде на екранот, изгледаше изненаден.
Очигледно е дека тој не бил свесен дека камерите се насочени кон ВАР-собата во моментот кога прегледувал апликација за обложување на својот мобилен телефон.
Неколку корисници на социјалните мрежи се обидоа да ја зголемат сликата, но не успеаја да утврдат на кој натпревар се обложил ВАР-операторот непосредно пред мечот ЦСКА – Локомотив Софија.
