Поразот од Грција (90-86) во Лимасол ја означи елиминацијата на репрезентацијата на Шпанија од Евробаскетот, на кој ја бранеше титулата освоена пред три години.
Шпанците овојпат го завршуваат натпреварувањето уште во групната фаза, а воедно останаа и без селекторот Серџо Скариоло, кој по една деценија работа со националниот тим ја напушта клупата на Црвената фурија.
Скариоло ја водеше Шпанија од 2009 до 2012 година, а потоа од 2015, па сè до денес. Во тој период со Шпанците освои четири европски злата, едно светско злато, олимписко сребро и бронза, како и една европска бронза.
Имајќи го тоа предвид, оваа елиминација од Евробаскетот претставува голем неуспех, но Скариоло на сè гледа од посветла страна.
„Никој не сонува дека ќе го загуби последниот натпревар. Би сакал да победевме, но не можам да бидам погорд на трудот што го вложија моите играчи. Го завршивме мечот со двајца 19-годишници на теренот затоа што тоа го заслужија. Играв со нив затоа што се чувствував удобно играјќи со нив. Ми се допаѓа таа слика – затворање на едни врати, а истовремено отворање на други што гледаат кон светлината.
Секоја љубовна приказна завршува. Тоа е како кога двојка ќе се разведе, но продолжува да се гледа и да има деца заедно. Имаме многу деца во овој тим за кои се грижев долги години и ми беше мило да ги гледам како растат. Никој не е незаменлив. Кога го презедов тимот, сите ми велеа дека е многу тешко да се подобри она што беше постигнато и сигурен сум дека тоа ќе го кажат и на секој што ќе дојде следен.
Мораме да гледаме во иднината со оптимизам. И ќе бидам многу среќен да видам како овие момци ќе растат во следните години. Совеста ми е мирна, дадов сè од себе. Спортот ве става на свое место. Добивме малку награда за трудот што го вложивме, но ако не победивме, тоа е затоа што правевме грешки во клучните моменти. Тој скок кој ако го фатевме, ќе бевме во Рига, неколкуте грешки повеќе отколку што беше потребно во последните четири минути… Но, не можете да се задржувате на тоа.
Емоцијата е да се видат овие момци како надополнуваат негатива од 16 поени, и тоа против вакви противници. Пред нив беа легенди како Слукас, Папаниколау… тие продолжија да се борат, жал ми е за нив. Не би имал ништо против уште еден медал, но освоив многу. Би сакал повторно да победуваат и да уживаат во прекрасното искуство да се игра за шпанската репрезентација“, порача Скариоло, кој во наредниот период ќе го предводи тимот на Реал Мадрид.
