Норвешкиот скијач Александер Омот Килде ќе ја пропушти целата сезона 2024/25 бидејќи мора да оди на уште една операција на рамото. Тој во јануари доживеа тежок пад за време на спустот во Венген, кога се удри во заштитната ограда. Првично лежеше неподвижен, а трката беше прекината 30 минути, по што беше пренесен со хеликоптер во болница.
Утврдено беше дека го расекол мускулот на листот од десната подколеница и ги скинал лигаментите на рамото, поради што беше опериран неколку дена подоцна.
Килде преку Норвешката скијачка федерација порача дека му е потребна уште една операција за рамото целосно да се подготви за напорите на скијањето.
Килде во 2020 година го освои Големиот кристален глобус. Во јуни се врати на скијањето, но поради инфекција на рамото мораше да се врати на опоравување, односно на антибиотици, а сега и на операција.
Тој е освојувач на олимписко сребро и бронза во комбинација и супер-џи, двоен сребрен медалист во спуст и супер-џи на скијачките светски првенства, повеќекратен освојувач на мали кристални глобуси и освојувач на Големиот кристален глобус во 2020 година.
Во Светскиот куп има вкупно 21 победа, 14 втори и 13 трети места. Неговата свршеница, фантастичната американска скијачка Микаела Шифрин (29), исто така беше повредена минатата сезона при пад во спустот во Кортина д’Ампецо.
Сезоната на Светскиот куп започнува овој викенд со два велеслалома во австрискиот Зелден. Скијачките ќе се натпреваруваат во сабота, а скијачите во недела.
