Репрезентацијата на Чешка забележа убедлив триумф од 7-1 над Малта во првиот контролен меч пред настапот на Европското првенство во Германија. Чесите контролката ќе ја одиграат против Македонија во понеделник на домашен терен во градот Храдец Кралове, а колку за споредба против кого играме, Македонија и Малта беа во иста група од квалификациите за првенството во Германија. Дома ги победивме минимално со 2-1, додека на гости бевме поубедливи и славевме со 0-2.
Чешка сите дилеми на денешниот натпревар ги реши уште во првото полувреме, кога веќе имаше водство од 2-0, а во вториот дел следуваше вистинска голеада. Чесите најпрво поведоа со 4-0, а потоа Малта го постигна почесниот погодок за нив на овој натпревар. Тоа како да ги разлути чешките фудбалери, кои во последните 20 минути уште трипати ја погодија мрежата на малтежаните.
Чешка на Европското првенство во Германија е во групата „Ф“ заедно со селекциите на Турција, Грузија и Португалија.
