Вечерва на „Енфилд роуд“ се очекува да има спектакл. Ливерпул е домаќин на Пари Сен Жермен во реванш-дуелот од осминафиналето во Лигата на шампионите. Пред една недела, англискиот гигант победи со 1:0 на гости во Париз на „Паркот на принцовите“, иако ПСЖ беше тимот кој доминираше.
Голманот на Ливерпул, Алисон Бекер, тогаш имаше неверојатни 10 одбрани на удари кои одеа директно во неговиот гол, а во финишот преку контранапад, англискиот тим стигна и до победа. Тренерот на Ливерпул, Арне Слот, знае дека ПСЖ и во реваншот ќе тргне офанзивно затоа што гостите нема што да загубат, но најавата е дека и домаќините нема да калкулираат.
„Ние се обидуваме да победиме на секој меч. Сакаме да биде поинаков меч од тој што беше минатата недела и тоа ќе биде нашата намера. Нема да одиме на нерешено. Сакаме да го имаме поседот на топката што е можно повеќе. Резултатот на првиот меч беше во наша корист, но играта беше во нивна корист. Имаме предност од 1:0 и тоа ни дава самодоверба, но ПСЖ е најтешкиот ривал со којшто се имаме сретнато сезонава. Имаат одлични играчи и одличен тренер“, вели Слот.
