Интер со 3:2 го победи Јувентус во дерби на Серија А кое привлече многу реакции, посебно поради делењето на правдата. Судијата Федерико ла Пења е цел на многу закани, од кои дел се и смртни.
Арбитерот Ла Пења се најде во центарот на скандалот откако додели втор жолт картон за Пјер Калулу, што автоматски значеше и исклучување на фудбалерот на Јувентус. Јувентус го загуби натпреварот, а неговите навивачи беа гневни поради судењето, па на социјалните мрежи имаше најразлични реакции, но и заканувачки фрази како: „Ќе те претепам на улица“, „Ќе те убијам“, „Знам каде живееш“.
Зборови што во некои случаи влијаеле врз неговата сопруга и децата, што го загрижува 43-годишниот судија од Рим, кој по професија е адвокат. Токму затоа Ла Пења поднел пријава до полицијата во Рим, која започнала истрага за да ги идентификува лицата одговорни за заканите. Сите заканувачки и клеветнички пораки испратени до него и до неговото семејство ќе бидат под лупа.
Поради овие закани, реакции стигнаа и од Здружението на судии: „Она што се случува ги надминува сите граници на цивилизацијата и на спортскиот дух“, рече заменик-претседателот Франческо Мацини. „Судија кој мора да се грижи за своето семејство е нешто што треба да ги вознемири сите. Ние веќе не сме во спортот: ние сме во нешто многу посериозно“.
