Англискиот дефанзивец Леон Барнет мораше да ја прекине кариерата на 32 години и вистинско чудо е што воопшто останал жив додека играл фудбал. По мечот меѓу Нортхемптон и Бери одигран на втори октомври, на Барнет му биле откриени срцеви проблеми.
„По направените контроли беше утврдено дека сум играл со околу 300 отчукувања на срцето во минута. Тоа е неверојатно. Лекарите ми рекоа дека некој што има толку отчукувања на срцето, веднаш би колабирал. Останав во шок, но добро е бидејќи сè можеше да заврши и многу полошо“, вели Барнет.
Нормалниот број на отчукувања на срцето се движи помеѓу 60 и 80 во минута во мурување. Спортистите кога не се активни бројот на отчукувања на срцето им е помеѓу 40 и 60 во минута, што само покажува колку било над нормалата работењето на срцето на Барнет.
Фудбалерот ќе го одработи договорот до крајот на сезоната со клубот, но јасно е дека никогаш повеќе нема да игра професионално фудбал.
