Новата натпреварувачка сезона во македонската клупска кошарка вечерва ќе го има официјалниот почеток, со Суперкупот на Македонија кој го носи името „Драган Василов-Цевка“.
Кошаркарскиот хепенинг во СРЦ „Кале“ во Скопје ќе стартува од 17 часот, кога на теренот ќе истрчаат актуечниот шампион во женска конкуренција, екипата на Баскет Кам од Македонска каменица, и Вардар, кој пак е победник во Купот на Македонија „Благоја Георгиевски-Буштур“.
Од 19.30 часот, е мечот во машка конкуренција во кој силите ќе ги одмерат првакот МЗТ Скопје Аеродром, и екипата на Кожув, кој минатата сезона беше финалист во Купот. Гевгеличани првпат ќе играат Суперкуп меч и за нив ова ќе биде историски натпревар.
Инаку во 2011 година е последен пат кога Суперкупот за мажи го освои некој друг, да не е МЗТ, а имаше и паузи во 2012-2014 и 2017-2020 кога не се играше Суперкуп.
Двата натпревари ќе бидат директно пренесувани на програмата на МРТ, а влезот за овој кошаркарски настан во СРЦ „Кале“ е слободен.
