Тренерот на Наполи, Лучано Спалети, е презадоволен од пласманот на неговиот тим во четвртфиналето во Лигата на шампионите, но не паѓа на комплиментите кои доаѓаат од неговите колеги.
Наполи е на добар пат по пауза од 32 години да ја освои титулата во Серија А, има 18 бода предност на табелата пред второпласираниот Интер, а вчера обезбеди пласман меѓу осумте најдобри во ЛШ откако и во реваншот славеше против Ајнтрахт, овој пат со 3:0.
Поради одличните игри и резултати, Наполи и Спалети добиваат комплименти од сите страни, а последен кој се огласи беше менаџерот на Манчестер сити, Пеп Гвардиола, кој италијанскиот тим го „прогласи“ за најдобар тим во Европа.
„Тоа не ме прави горд и нема никакво влијание врз мене. Тоа е игра која сите ја знаат и чија цел е да се зголеми притисокот. Дали да го ставиме Наполи пред Сити? Ако тие потрошат 900 милиони, а ние девет, постои причина за такво нешто. Тоа се игри со кои сакаат да не срушат“, изјави Спалети.
