Наполи по 33 години повторно стана шампион на Италија, но еден од „носечките столбови“ на успехот, тренерот Лучано Спалети, ги минува последните денови и недели како предводник на тимот.
Наводно Спалети не може на претседателот Аурелио де Лаурентис да му прости неколку работи, меѓу кои и тоа што АДЛ не му кревал телефон кога му се јавувал од Удине вечерта, кога ја обезбедија титулата за да си честитаат, и тоа што наместо претседателот лично, други лица од канцеларијата на клубот контактирале со Спалети околу условите за новиот договор.
Наскоро треба и официјално да биде објавено дека Спалети нема да го продолжи договорот со Наполи и по завршувањето на сезонава, клубот ќе треба да ангажира нов шеф на стручниот штаб.
Веќе се спомнуваат и потенцијалните наследници на Спалети, а тоа се Антонио Конте, Рафаел Бенитес, Џан Пјеро Гасперини, Роберто Де Ѕерби и Винченцо Италијано.
Освен Спалети, речиси сигурно е дека ќе си замине Кореецот Ким, кој воодушеви со своите игри во одбраната, а може да си замине и првиот стрелец Виктор Осимен, за кого има сериозен интерес од неколку големи и богати клубови.
