Трансферот на Нико Вилијамс во Барселона пропаднал откако крилниот фудбалер на Атлетик Билбао побарал во договорот да биде вметната клаузула која би му овозможила слободно да замине, доколку не биде регистриран во Ла Лига до одреден рок.
Според информациите, 23-годишниот репрезентативец на Шпанија имал усмен договор со Барса, но неговите агенти инсистирале во договорот да стои одредба според која тој би можел да ја напушти Барселона како слободен играч ако не биде регистриран до 20 август.
Сепак, спортскиот директор на Барселона, Деко, категорично одбил да прифати ваков услов, иако, како што се наведува, имало слични случаи во минатото, вклучувајќи го и примерот со Дани Олмо.
Агентите на Вилијамс аргументирале дека тој има понуди и од други врвни клубови, меѓу кои Баерн Минхен и Арсенал, кои биле подготвени да му понудат повисока плата од онаа на Барселона.
И покрај тоа што Деко ги уверил дека играчот сигурно ќе биде регистриран пред крајот на преодниот рок, Нико Вилијамс и неговите агенти решиле да ја отфрлат опцијата со Барселона.
На крајот, Нико Вилијамс потпиша нов договор со Атлетик Билбао на 10 години, а клаузулата за откуп сега изнесува 100 милиони евра.
