Непосредно пред почетокот на подготовките на фудбалската репрезентација на Македонија за дуелите против Летонија и Ерменија, двата на гостинси терен, спортскиот директор на фудбалскиот национален тим, Дени Масев, го најави своето заминување од позицијата.
Масев во својата реакција ја образложи одлуката и вели:
„Жал ми што на ваков начин и во овој момент, пред почеток на подготовките на репрезентацијата се обраќам до јавноста, но веројатно за сè треба да има почеток и крај. Од денеска веќе нема да бидам во функција на македонската репрезентација. Причините се длабоки, но се сведуваат на мојот однос со претседателот Сејдини и потпретседателот Ракиџиев. Федерацијата се сведува на сè, но најмалку на интересот за некаков развој на македонскиот фудбал. Јас како човек кој беше директен сведок и на најголемиот успех на репрезентацијата имам право да го кажам својот став. Жал ми е за тимот и фудбалерите, но едноставно понекогаш треба да се зборува отворено, па макар тоа да предизвика и негативна реакција. Тврдам дека веќе подолг период Федерацијата е буквално приватизирана. Интерсот е присутен само за првите двајца луѓе, претседателот Сејдини и неговиот заменик Ракиџиев. Во Управниот одбор има чесни луѓе, но, за жал, не се запознаени со работите кои носат интерес само за Сејдини и Ракиџиев. За Сејдини и оваа Ќуќа на фудбалот, јас лично се заложив на секој можен начин. Од работи поврзани со А репрезентацијата, моја базична обврска, па сè до приходи за ФФМ остварени преку контакти со деловни луѓе и компании. Дури и влегов во отворен конфликт со блиски пријатели. Сметам дека сега е време да ги менуваме работите. Со оглед на тоа дека пред нашите фудбалери и пред репрезентацијата се многу важни натпревари со Летонија и Ерменија, јас како Дени Масев нема во овој момент гласно да ги посочам големите проблеми и манипулации во Федерацијата, за која сум подготвен да ги обелоденам по двата споменати дуела од Лигата на нациите. Во периодот кој следува еднаш засекогаш треба да се расчисти со милионските суми кои се трошат на сè само не за доброто на фудбалот. Од фамозните трансакции до хотелот ‘Куќа на уметноста’, па сè до т.н. инфраструктурни „проекти“ во Велес и Македонија и до вработувањата во Федерацијата.
