Српската фудбалска репрезентација вечерва во Виена ќе игра против домаќинот Австрија во првиот меч од баражот за опстанок во Сегментот А во Лигата на нациите. Европската фудбалска федерација од претходно ја имаше казнето Србија дека не смее да има поддршка на двата следни натпревари на коишто игра на гостински терен, но фановите на нашиот северен сосед успеаја да ја надитрат УЕФА.
Според најавите, Србија ќе има поддршка од околу 15.000 навивачи на стадионот „Ернст Хапел“. Оваа вест ја потврдиле од Фудбалската федерација на Австрија, што значи дека гостинската селекција ќе има речиси една третина од гледачите на стадионот како нивна поддршка.
„Важно е дека ќе имаме илјадници наши навивачи затоа што нашата дијаспора тука е голема. Тоа ќе биде мотив повеќе за нашиот тим. Апелирам да се внимава и да не се дојде до некој несакан инцидент затоа што ќе бидеме под надзор на УЕФА. Нека се навива за Србија во духот на ферплејот, а ние ќе се обидеме да не ги разочараме“, рече селекторот на Србија, Драган Стојковиќ-Пикси.
