Репрезентацијата на Србија својот настап на Европското првенство во Германија го започнува со дуел против најголемиот фаворит за освојување на титулата, Англија. Мечот помеѓу нашите соседи и Гордиот Албион ќе се одигра во недела, во Гелзенкирхен, а српските медиуми пренесуваат очекувања од инциденти и провокации од албанските навивачи.
Според српските медиуми, поголема група планира на денот на натпреварот да пристигне од Дортмунд во Гелзенкирхен и пред натпреварот да предизвика инциденти со српските навивачи. Медиумите од нашиот северен сосед пренесуваат дека провокации од страна на албански навивачи имало и пред хотелот во којшто е сместена репрезентацијата на Србија, а двајца навивачи имале обид и да влезат во хотелот.
Сепак, се чини дека германската полиција нема да остави ништо на случајноста и доколку српските медиуми имаат вакви информации, нив сигурно ги имаат и германските безбедносни служби.
