Ретко кој очекуваше дека кариерата на Еден Азар во Реал Мадрид за помалку од две години ќе го достигне самото дно. Белгиската ѕвезда и во втората сезона како член на Кралевите не може да го покаже раскошниот квалитет поради чести повреди, а сега му следува нова пауза до четири недели.
За вкупно 150 милиони евра (вклучувајќи ги и бонусите) колку што му чинеше трансферот од Челзи, Реал буквално не доби ништо за овие нецели две сезони, па затоа Азар е изгласан за најлошо засилување во историјата на Кралскиот клуб.
Повеќе од 40.000 читатели на шпанскиот лист „Марка“ гласаа на анкетата, по што Азар доби 49% од гласовите. Зад него е Кака со 17% гласови, па Џонатан Вудгејт со 11%. Следуваат Герет Бејл со 13%, Роберт Просинечки со 6% и Арјен Робен (1%).
Офанзивецот кој неодамна наполни 30 години, поради повредите немаше прилика во целост да се истакне и да се обиде да ги оправда средствата, а анкетата е доказ дека навивачите на Реал воопшто не се задоволни од него.
