Македонската фудбалска репрезентација попладнево во Никозија има мисија да го задржи првото место во групата од Лигата на нациите, а со тоа и да се избори за пласман во Сегментот Б за следниот циклус. Македонија е лидер во групата со 9 бода, еден повеќе од Ерменија, што значи дека нам ни одговара и нерешен резултат, додека противникот мора да брка победа.
Селекторот Игор Ангеловски има многу проблеми околу составот затоа што недостасуваат повеќе стандардни првотимци. И покрај тоа, Ангеловски најави дека Македонија ќе оди на победа затоа што тој како тренер „не знае“ да игра на нерешено.
Се очекува Македонија да стартува во формација 3-5-2, и тоа со Шишковски на голот. Во дефанзивниот ред треба да бидат Зајков, Велковски и Муслиу, а од страничните позиции да помагаат Ристовски и Бејтулаи. Борбата на средината на теренот треба да ја водат Тотре и Костадинов, а малку поистурен треба да биде Трајковски. Во нападот двете места треба да бидат резервирани за Несторовски и Тричковски.
Ерменците денеска се соочија со големи проблеми околу составот затоа што дури четворица фудбалери се покажаа дека се позитивни на корона-вирусот на последното тестирање. Доколку сакаат да завршат на првото место во групата, Ерменците мора да победат против Македонија.
