Четири меча има во денешната понуда во НБА-лигата, а интересно е дека на сите фаворитската улога ја имаат домаќините. Оклахома стартуваше со три порази, но сега има три победи во низа и не би требало да има проблем да ја продолжи оваа убава серија против Орландо, кој е наслаб тим на Истокот само со една победа од седум средби.
Феникс ја победи Минесота на последните четири меѓусебни дуели, а Сонцата сега пред своите навивачи треба да стигнат и до „пет од пет“. Многу понеизвесно ќе биде на дуелите Бруклин – Чикаго и Мајами – Голден стејт, но за храбрите обложувачи тука би играле на „четири кеца“.
Вкупно 19-мина кошаркари се дел од понудата за „плус-минус“ поени, а на „чело“ е главната ѕвезда на Голден стејт, Стеф Кари. Бекот на Воините во шест од седумте дуели сезонава има 30+ поени, а сега „границата“ е на 26,5 поени.