Столе Димитриевски се соочува со неочекувани проблеми во момент кога се очекуваше да направи следен чекор во својата кариера и да ја напушти Валенсија. Македонскиот репрезентативен голман претрпе повреда на левото рамо за време на тренинг, што значително ќе го забави неговиот трансфер.
Од клубот кратко информираа дека голманот ќе биде подложен на медицински третмани, физиотерапија и рехабилитација додека не се врати на терените. Засега не е јасно колку ќе трае неговото отсуство.
Оваа ситуација доаѓа во незгоден момент и за македонската репрезентација, која на почетокот на септември ги продолжува квалификациите за Светското првенство 2026. Димитриевски е клучна фигура во тимот, па неизвесноста околу неговиот настап сигурно ќе предизвика загриженост кај селекторот Благоја Милевски.
