Струга Трим Лум продолжува во победнички стил во шампионатот, остварувајќи го седмиот триумф во осумте одиграни мечеви. Тимот на Бледи Шкемби денеска славеше на домашен терен против Пелистер со 2-0 и се искачи на првото место на табелата со 22 бода.
Стружани во финишот успеаја да го скршат отпорот на Пелистер и двата гола ги постигнаа во последните десетина минути. Двоен стрелец беше Христијан Малески.
Башкими и Вардар во Куманово одиграа меч без голови. Тоа беше тензичен натпревар, во кој и двете екипи повеќе внимаваа да не загубат. Најдобрата шанса за Башкими ја имаше Марко Симоновски, а на спротивната страна Михаил Талевски пропушти можност во финишот да му донесе триумф на Вардар.
По ова реми, Вардар е вторпласиран на табелата со 20 бода, колку што има и третопласираната Шкендија.
