Проектот на Бруклин нетс со кој се напаѓаше шампионски прстен пропадна во првата сезона, откако ноќеска Мрежичките на домашен терен ја загубија мајсторката против Милвоки бакс со 111:115, по што Елените се први финалисти во Источната конференција.
Големата тројка на Бруклин создадена од трите ѕвезди Дурант, Харден и Ирвинг, не успеа во намерата да го одведе тимот до посакуваното конференциско финале, па и во самата битка за титулата. Јанис Адетокумбо и дружината го имаа рецептот за да се спречат врвните кошаркари, а имаа помош во тоа што Ирвинг го пропушти и овој меч поради повреда.
Првпат од 2008 година се случува во мајсторка двајца играчи да постигнат по 40+ поени. Дурант заврши со неверојатни 48 поени, постигнувајќи го и кошот за израмнување во последната секунда со кој го одведе мечот во продолженија. Адетокумбо пак оствари дабл дабл од 40 поени и 13 скока.
Нетси постигнаа само два поени во петте минути дополнително време неможејќи да ја пробијат одбраната на Милвоки, па сега Елените го чекаат подобриот од серијата меѓу Атланта и Филаделфија, која ќе се реши ноќеска во мајсторка.
https://www.youtube.com/watch?v=RY8H8WL–h0
