Кога двајцата најдобри тенисери на светот ќе се сретнат во полуфинале на некој турнир, особено ако е гренслем како Ролан Гарос, тогаш јасно е дека тој меч е повеќе од обично полуфинале, но денешниот дуел на Новак Ѓоковиќ и Рафаел Надал на париската земја има и дополнителна историска важност.
Ако победи Надал, кој важи за фаворит според квотите во обложувалниците, бидејќи Шпанецот е „крал на земјените терени“ и има 13 титули на Ролан Гарос, ќе се пласира во финале и ако го добие тоа финале, ќе избие на прво место на вечната листа на тенисери по бројот на освоени гренслем-турнири. Во моментов Рафа е изедначен со Роџер Федерер.
Ова е единствениот гренслем-меч на кој Ѓоковиќ не е фаворит на хартија. Светскиот рекет број 1 има една титула во Париз, лани беше декласиран во финалето и сега бара реванш. Ако Новак успее и го освои овој гренслем, се чини дека веќе ништо нема да го спречи тој да биде тенисерот со најмногу гренслем-титули во историјата бидејќи на следните два до крајот на летово тој ќе биде топ-фаворит.
Ѓоковиќ на Ролан Гарос има една победа и седум порази против Надал. Дербито број 58 помеѓу Србинот и Шпанецот ќе почне попладнево, по 17.30 часот. Пред тоа, од 15 часот силите ќе си ги одмерат Стефанос Циципас и Александер Зверев.
