Светската фудбалска ѕвезда, Португалецот Нани, на 38 години официјално ја заврши играчката кариера.
Интересно, за време на претходните трансфер-периоди, искусниот Португалец беше поврзуван со можен ангажман во македонскиот прволигаш Гостивар. Раководството на клубот не ги демантираше овие шпекулации, а напротив, дури ги поттикна.
Сепак, трансферот никогаш не се реализираше, а по оваа одлука, јасно е дека Нани нема да пристигне во Гостивар, барем не како играч.
Во својата славна кариера, Нани играше за Спортинг Лисабон, Манчестер јунајтед, Фенербахче, Валенсија, Лацио, Адана Демирспор, а последниот клуб за кој настапуваше беше Естрела Амадора во Португалија.
За репрезентацијата на Португалија, тој одигра 112 натпревари и постигна 24 голови, оставајќи голем белег во историјата на националниот тим.
