Американската славна скијачка Линдзи Вон објави дека ќе мора да се подложи уште на неколку операции, по комплексните повеќекратни повреди кои ги доби по падот во спуст трката на Олимписките игри.
Вон се натпреваруваше во спустот и покрај тоа што девет дена претходно при друг пад ги скина предните вкрстени лигаменти на левото колено.
„За жал, доживеав сложена фрактура, која моментално е стабилна, но ќе бидат потребни неколку операции за правилно закрепнување. Иако вчерашниот ден не заврши онака како што се надевав и покрај интензивната физичка болка, не жалам. Стоењето на стартната капија вчера беше неверојатно чувство што никогаш нема да го заборавам. Сознанието дека стоев таму со шанса за победа беше само по себе победа. Исто така знаев дека трките се ризични. Алпското скијање отсекогаш било и секогаш ќе биде неверојатно опасно. Мојот олимписки сон не заврши онака како што сакав. Не беше крај на книга или бајка, тоа беше само живот“, напиша 41-годишната Вон на социјалните мрежи.
Таткото на Линдзи, Алан Килдоу, изјави дека американската суперѕвезда повеќе нема да се натпреварува.
„Таа има 41 година и ова е крајот на нејзината кариера. Нема да има повеќе скијачки трки за Линдзи сè додека имам право на глас во ова прашање“, рече таткото.
Килдоу и остатокот од семејството на Вон – брат и две сестри – беа со неа додека таа беше лекувана во болница во Тревизо по нејзиниот пад и евакуација со хеликоптер од патеката Кортина во неделата.
Килдоу одби да коментира детали за повредите на Вон, но зборуваше за нејзината емоционална состојба.
„Таа е многу силна личност. Ја познава физичката болка и ги разбира околностите во кои се наоѓа. И е способна да се справи со неа. Подобро отколку што очекував. Таа е многу, многу силна личност. И затоа мислам дека ѝ оди многу добро“, рече Килдоу, кој ја научил Вон да скија и спиел во болничката соба на неговата ќерка.
Вон се врати на натпреварувањата во Светскиот куп минатата сезона по речиси шестгодишна пауза. Оваа сезона таа победи на два спуста и заврши на подиумот во седум од осумте трки од Светскиот куп што ги заврши.
Вкупно таа има постигнато 84 победи на Светскиот куп во својата кариера, што ја прави втора најуспешна скијачка на сите времиња, зад Микаела Шифрин, која има 108.
