Фудбалскиот клуб на Олимпија Љубљана НК доби официјално известување од УЕФА дека ќе биде казнет поради недолично однесување на нејзините навивачи за време на натпреварот од плејофот од Конференциската лига против Борац Бања Лука. Од словенечкиот тим најавија дека поради оваа одлука на УЕФА, клубот реши да ги тужи оние навивачи кои се одговорни за оваа казна.
Казната воопшто не е мала и изнесува 183.125,00 евра, а тука се вклучува и делумно затворање на стадионот на следниот европски натпревар. Од 2022 година, клубот платил повеќе од половина милион евра казни за слични прекршоци на трибините, вклучително и повторени немири, насилни акти и расизам од поединци.
„НК Олимпија Љубљана жестоко се оградува од ваквите навивачи бидејќи насилството и расистичките изјави немаат место на фудбалските стадиони и неопходно е да се стави крај на тоа. Раководството на клубот одлучи да поднесе кривична пријава и барања за отштета против лицата одговорни за овие инциденти. Со помош на безбедносните снимки и персонализација на билетите, сторителите ќе одлучат и ќе ги прочитаат нивните санкции“, изјавија од тимот од Љубљана.
И покрај овие предизвици, клубот изрази благодарност до своите верни навивачи за исклучителната поддршка во текот на целата сезона, како на домашниот стадион, „Стожице“, така и низ Европа.
Тие се особено тажни што малцинство навивачи му нанесоа штета на клубот во време кога тие бележат значителен раст и имаат сериозни планови да инвестираат во инфраструктура и играчки кадар. Играчите, стручниот штаб и сите вработени во НК Олимпија Љубљана на крајот порачаа дека ја ценат силната поддршка од трибините, но бараат таа да биде искажана на спортски начин и во корист на клубот.
Оваа одлука на Олимпија да ги казни своите навивачи кои прават проблеми можеби треба да почне да ја применуваат и клубовите во македонското првенство, инаку џабе се соопштенијата дека тие се оградуваат од поединци кои не се однесуваат соодветно на трибините.
Последен ваков пример во Македонија е гнасното однесување на „Балистите“, навивачите на тетовска Шкендија. Пред мечот со Брера, додека траеше минута молк како почит за загинатите во трагедијата во Кочани, од трибината каде што се фановите на Шкендија се пееја песни.
Од Шкендија формално испратија соопштение дека тоа било мала група навивачи, но ако навистина тетовци сакаат да покажат дека им е жал што нивните симпатизери направија еден таков гнасен чин, треба да го следат примерот на Олимпија Љубљана, да ги најдат виновните и, секако, да ги казнат затоа што на таквите луѓе не им е местото на трибините на стадионите.
