Првакот МЗТ Скопје Аеродром дури во последните две минути го скрши отпорот на Кожув, а на слични маки беше ставен и ТФТ против Тиквеш, но водечките две екипи во кошаркарската Суперлига сепак го најдоа патот до победата.
Во следното коло ТФТ е домаќин на Металците и тој меч може да биде пресуден околу првата позиција на крајот и предноста на домашниот терен во плејофот.
Попладнево Црно-белите од Тафталиџе беа подобри од Тиквеш со 80-74, но на една и пол минута до крајот водеа кавадарчани кои се борат за место во плејофот.
Штрковите во Аеродром одвај го најдоа патот до победата од 84-75. Конечната разлика е и највисокото водство што го имаше МЗТ. Гевгеличани имаа нерешен резултат на три минути до крајот, но благодарение на Танасковиќ во рекетот и тројките на Дамјан Стојановски и Петков, домашните освоија два бода.
