Екипата на Тиквеш е најголемиот добитник по 22-рото коло, последно од регуларниот дел на кошаркарската Супер лига. Кавадарчани на домашен терен славеа над лидерот ТФТ со убедливи 102-74. Екипата од Тафталиџе и со пораз остана на првото место, а неочекувано загуби и второпласираниот МЗТ Скопје и тоа од Чаир со 76-68.
Најпријатното изненадување е дебитантот Маџари, кој финишираше на четвртата позиција, откако вечерва го победи тимот на Ангели со 106-81.
Резултати:
Чаир – МЗТ Скопје 76-68
Гостивар – Феникс 76-74
Кожув – Пелистер 89-82
Работнички – Куманово 76-72
Тиквеш – ТФТ 102-74
Маџари – Ангели 106-81
ТФТ е лидер со 41 бод, еден повеќе од МЗТ, а во Супер лигата ќе играат уште и Пелистер, Маџари, Кожув и Тиквеш. Во борбата за опстанок веќе е јасно дека Ангели ќе испадне, а во неповолна ситуација е и Гостивар со 28 бода. Пред нив се Феникс (30), Работнички (31), Куманово (32) и Чаир (33).
Супер лигата следната сезона ќе брои 10 екипи, па оваа сезона дури три екипи ќе го напуштат најквалитетното кошаркарско натпреварување кај нас.
